Urretxuko eta Zumarragako Kultur Artistak eta artelanak aterkia

Espazio publikoan eragitea

Ideia garrantzitsua da hau guretzat. Artista bakoitzak bere sorkuntza lana egin du eta modu indibidualean aztertu da eta zabaldu da bai kalean eta baita sarean zehar.

Baina era berean, prozesu guztiak artelan bat osatzen duela uste dugu. Espazioan interbentzio bat. Nola ikusten den espazio hori lanak jarri aurretik eta nola ondoren?

Espazio hori guretzat gure herriek osatzen dute eta eskuhartze hori espaziala izateaz gain, bestelakoa izan daiteke. Gure helburua sentsazioak eta pentsamenduak komunikatzea da, ohituta gauden paisaiarekin hautsiz eta paisaia horrekin erlazionatzeko beste modu bat proposatuz.

Eskuhartze hau espazio publikoa aldatzeko jarduera moduan ikusten dugu, espazio hori urbanoa edo naturala izan daitekelarik. Espazio horretan, berariaz eraikitako objektuak sartu ditugu, espazioaren eta esku-hartzearen arteko erlazioa ezartzeko. Ideia hau kontzeptuala den arren, bat egiten du zuzen zuzenean gure manifestuarekin.

Pentsamendu honek erabateko gaurkotasuna du, are eta gehiago pandemia garai hauetan, non espazio publikoaren erabilera hainbeste murriztua izan zaigun. Ekimen honekin, espazio hori berreskuratu nahi izan dugu, kale eta gune horiek, herritarron elkargunerako eta sozializaziorako leku moduan ulertuaz.